10 كراكيب مالهاش لازمة.. ده وقت التخلص منها

هو ليه احنا بناخد وقت طويل في تنظيف البيت؟ الإجابة يا عزيزتي هي إننا من أكثر شعوب العالم حباً في جمع أي كراكيب. عندما متلازمة اسمها “ماهو يمكن ينفع”… وفي الآخر الحاجات اللي بنحتفظ بيها لا بتنفع ولا بيكون لها لازمة. لكن إن جيتي للحق لازمتها الوحيدة هي إننا بنفضل نرتب فيها كل مرة ونشيل التراب ونرجعها تاني للدرج. بس صدقيني بيتك مش متحف وكل الكراكيب دي هي مصدر ضياع الجهد والفوضى والطاقة السلبية. يبقى الحل إنك تتخلصي من الحاجات الجاية.

كراكيب مزعجة تسبب الفوضى والطاقة السلبية

سواء كانت مساحة البيت صغيرة أو كبيرة فوجود أي كراكيب يعتبر من المؤثرات السلبية جداً. وفي كثير من علماء الطاقة أكدوا إن الكراكيب باختاف أشكالها تعتبر مصدر من مصادر الطاقة السلبية. كذلك تخيلي نفسك كل يوم بتقومي تنظمي نفس الحاجات وتشيليها. لكن لو سألتي نفسك إنت أصلاً بتشيليها ليه؟ من المؤكد إن مافيش إجابة. لكن احنا النهاردة جايين نشجعك.. ياللا قومي وجرأي قلبك وارمي كل الكراكيب الجاية.

الشرابات القديمة

في الأمثال القديمة بيقولوا اللي بيروح مش بيرجع.المثل ده بينطبق على العمر، البني آدمين، الأمل. فانت عايزة فردة الشراب ترجع بعد ما تروح. ده شيء غير منطقي. لذلك واجهي نفسك بالحقيقة المرة. ليه محتفظة بفرد الشرابات مع إن شريكها ضاع ومش هيرجع. قومي يا بنتي استهدي بالله وارمي فرد الشرابات اللي مابقاش لها حبيب ولا قريب.

الشواحن القديمة والأسلاك

لو قلتي لي أنك ناوية تعملي مصنع إعادة تصنيع للبلاستيك والأسلاك ساعتها بس هكون مقتنعة إن الاحتفاظ بالأسلاك القديمة والشواحن له لازمة. لكن كلنا عارفين إن الشاحن القديم مش بيتصلح والأسلاك مش بيكون لها أي لازمة. وبالتالي التخلص منها جميل سوف يحبه المنزل وكل من يعيشون فيه.

أوراق وفواتير

لو فتحتي أي درج في البيت هتلاقي أوراق فواتير كثيرة جداً. مثلاً فواتير السوبرماركت من 13 سنة. فواتير النور والمية. فواتير المشتريات. لكن في النهاية إنت مش هتحتاجي كل ده. خصصي علبة صغيرة للفواتير المهمة واتخلصي من كل الأوراق اللي مالهاش لازمة.

السكاكين القديمة

شيء واحد يخليكي تقنعي أي حد حواليك باحتفاظك بالسكاكين القديمة. وهو إنك ناوية تفتتحي متحف للأنثروبولوجي لتوثيق رحلة استخدام السكينة عبر مراحل الأمومة المختلفة. لكن لو مش ده هدفك يبقى تخلصي منها فوراً.

علب الأدوية

كل بيت مصري في رف أو علبة للأدوية. غالباً بتكون منتهية الصلاحية. لكن لو طلبنا منك تتخلصي منها بترفضي تماماً. هو مافيش تفسير علمي لأسباب الرفض. لكن علمياً كل الدكاترة والعلماء بيحلفوا ليكي إن الأدوية دي لازم تترمي لأنها مصدر خطر ولا يمكن تستخدميها تاني.

الأكياس البلاستيك

في في المطبخ ركن غالباً بيكون وراء الغسالة أو الثلاجة اسمه ركن الأكياس القديمة. تقريباً الأم المصرية ممكن تقبل إنها تتنازل عن دهبها وما تتنازلش عن ثروتها التي تجمعها من سنوات طويلة من الأكياس البلاستيك. طب ليه هه ليه؟

علب بدون غطاء

لازم كلنا نعترف إن العلب مهمة جداً للاحتفاظ بالأكل داخل الثلاجة. لكن لو الغطاء اختفى في فجوة زمنية ساعتها لازمة العلبة هتكون إيه. لو مش ناوية تزرعي فيها ذرة أو صبار يبقى التخلص منها هدف إنساني نبيل.

كراكيب المكياج القديم

ممكن تكون أنواع المكياج اللي عندك قيمة جداً وسعرها غالي. لكن ده مش مبرر للاحتفاظ بيها بعد انتهاء تاريخ صلاحيتها. أضرار استخدام المكياج المنتهي الصلاحية كثيرة جداً ومحتاجة تتخلصي منه.

المجلات والجرائد القديمة

احنا عارفين طبعاً إن فيه مواضيع انت مهتمة بيها واحتفظت بالمجلة عشان تقريها وانت فاضية. لكن برضه احنا عارفين إنك مش هتبقي فاضية لمدة خمس سنين جاية. لذلك لو المجلة عدى عليها أسبوع كل الخبراء بيأكدوا ليكي إن خلاص فات ميعاد قرائتها.

الأحذية المؤلمة

كام مرة لبستي جزمة جديدة وقررتي وحلفتي إنك عمرك ما حتلبسيها تاني. طب طالما كده إيه الداعي من احتفاظك بيها. واجهي نفسك بالحقيقة واعملي زي الحكمة ما بتقول “ابتعد عن ما يؤذيك”.

ودي كانت 10 كراكيب وجودهم داخل البيت عامل شبه الاحتلال. غير مبرر ومش مفهوم ومالهوش أي لازمة. جربي كده تتخلصي منهم وقولينا حسيتي بإيه.

اقرأي أيضا: طريقة تلميع الفضة بـ 6 خطوات بسيطة وسهلة جداً.