إنت لسة شوفتي حاجة؟؟

إنت لسة شوفتي حاجة؟ دي الكلمة اللي كل أم بتسمعها في بداية رحلتها. بس يا ترى الكلمة دي وراها إيه؟ ده اللي هتقوله لينا هبة أمين في تجربتها النهاردة. 

مشاعر كتير مرت عليا وأنا أم جديدة مشاعر مختلفة وملخبطة ومصدقتش أن كل المشاعر دي بالحلو منها والمر  حتعدي إلا لما قعدت وسرحت مع نفسي ولقيت عدى عليا عشر سنين  وأكتر وأنا أم.

اه يا دماغي !!

لك أن تتخيل دماغ الأم بتكون عاملة إزاي من أول ماتعرف انها حامل مرورا بإكتئاب الحمل والولادة.  وبعد الولادة بقى واحلى شغل هرمونات. عياط، ضحك ،عصبية، كولكشن رهيب كله شغال مع بعض بدون توقف. دماغ شغالة مبتفصلش حبة  صغيرة عشان ترتاح فطبيعي دماغ كل أم تهنج وتتعب.

إحساس المضروب في الخلاط ما بين أنا كدة أم بدري ولا ده وقت مناسب للحمل وأنا قد المسؤولية ولا مش قدها. مرورا بمستقبلي هيقف هنا خلاص. وهبقى ماما وقاعدة في البيت. هبقى ست بيت شاطرة وأجدع أم تعمل احلى بشاميل. ولا هعرف اكمل بعد الولادة والأمومة ومستقبلي اللي نفسي فيه من شغل او دراسة هعرف احققه و أتميز فيه.

كل ده عادي يا عزيزتي أنت مش لوحدك على الكوكب اللي مر بكل المشاعر دي،  انت مش بتدلعي و لا بتكبري المواضيع زي ما بيتقلك من ناس كتير انت طبيعية جدا.

إنت أم جديدة حلوة

كل أم حلوة، كل أم مميزة صدقي أن كله بيعدي أنت أصل الحكاية. صدقي في نفسك قوي هتكوني أم شاطرة وهتعرفي تبقى مسؤولة لو قررتي تكون الأمومة وحدها وظيفتك وشغفك أنت قدها ادعمي نفسك. لو قررتي تكملي دراسة وشغل مع طفلك أنت قدها و بتعملي المستحيل.

في أصوات كتير هتكون جنبك عاوزة تنصحك وتقولك تجربتها؛ خدي منها اللي يناسب حياتك وحققي تجربتك الخاصة بلاش تكوني نسخة مكررة من حد.

وفي أصوات تحبط فيكي وتحطم كل حماسك لتجربتك الجديدة؛ تجاهليها تماما وحاولي تبعدي عنها بالذات في الأوقات الاولى من الحمل والولادة لأنها ممكن تزيد من اكتئابك  و تؤثر عليك بالسلب.

إنت قدها

وفي النهاية رسالة دعم وتحية واجبة  لكل أم جديدة ورسالة حب لكل أم حامل، شايلة بين ضلوعها روح جديدة هتنور دنيتنا، هتقدري مفيش حاجة توقفك و متسمعيش لكلمة أنت لسة شوفتي حاجة.

 بقلم: هبة أمين

للمزيد: اشتغالات الاطفال..هي خيال ولا دهاء؟

 .