ازاي تتأكدي من جودة الفسيخ والرنجة في شم النسيم؟

يا ترى السنة دي قررتي تحضري سفرة من الفسيخ والرنجة في شم النسيم؟ بالرغم من إن ناس كثيرة هتأجل السفرة العظيمة دي لعيد الفطر أو بعد العيد بسبب رمضان. لكن في ناس أكثر مش قادرة تقاوم ومقررة إنها تحتفل بشم النسيم ورمضان مع بعض. لكن في كل الأحول لازم نتأكد من جودة الفسيخ والرنجة اللي هنشتريهم. لأن من المعروف إن النوعية دي من الأسماك لو ماكنتش جيدة فهي بتؤدي لمشكلات صحية كثيرة أخطرها التسمم. لذلك قبل ما تشتري الفسيخ أو الرنجة لازم تتأكدي من الحاجات اللي جاية.

علامات جودة الفسيخ والرنجة

الفسيخ أو الرنجة من الأسماك اللي بيتم تمليحها بطرق كثيرة. لذلك من الممكن يتعرضوا لبكتيريا خطيرة جداً خلال عملية التمليح لو ما تمتش بالطريقة الصحيحة. وبكتيريا السالمونيلا من أخطر البكتيريا اللي ممكن يسببها تناول الفسيخ الفاسد. لكن في نفس الوقت لو تم التمليح بطريقة صحية ونظيفة الخطر بينعدم تماماً. لذلك من المهم إنك تدوري على علامات جودة الفسيخ والرنجة واللي هنشرحها كالآتي:-

علامات جودة الفسيخ

شكل وملمس اللحم

الفسيخ الجيد بيكون لحمه متماسك. ولونه وردي. تقدري تعرفي إنه سليم وصحي من خلال كذا طريقة:-

• قطعي السمكة من المنتصف لو لاقيتي إن لون لحمها محمر ووردي من غير ما يتغير للون البني أو الأزرق ده دليل على إنها سليمة.
• دوسي على لحم السمة لو لاقيتي إن اللحم بينزل للأسف نيتجة الضغط.
• لحم الفسيخ الجيد بيكون سميك ومتماسك مش مهترىء. كذلك بيكون ملمسه طري ولزج.

المظهر الخارجي 

تقدري تعرفي جودي الفسيخ من خلال شكل السمكة الخارجي. وعلامات السمكة الجيدة بتظهر في الآتي:-

• عينها مفتوحة وواضحة وخالية من العكارة.
• مافيش علامات انتفاخ على السمكة أو على تجويف البطن.
• جلد السمكة سليم وخالي من علامات التشقق أو التجعد.

الرائحة

في علامات تقدري تعرفيها من خلال رائحة الفسيخ. لكن بالرغم إن رائحة الفسيخ نفسها نفاذة جداً إلا إنها بتكون مقبولة. لكن في حالة لو حسيتي إن الرائحة مش مقبولة فده دليل على عدم جودة السمكة تماماً.

الرنجة

ممكن تعرفي العلامات المتعلقة بجودة الرنجة وإنها صالحة للتناول من خلال معرفة الحاجات الجاية:-

• من المهم إن السمكة تكون متماسكة ولحمها سميك وجلدها خالي من التشققات.
• اتأكدي من الختم الموجود على الرنجة.

كل دي علامات مهمة جداً ما ينفعش الإهمال فيها وانت بتشتري الفسيخ والرنجة سواء لشم النسيم او لعيد الفطر. عشان العيد يمر بسلام من غير ما أي حد في العائلة يشتكي من ي أعراض أو يتعرض لأي مخاطر ممكنة نتيجة التصنيع الخاطئ للأسماك المملحة..