الروتين الليلي للمدرسة وأهميته وإزي نعمله صح

هل جربتي قبل كده عمل الروتين الليلي للمدرسة؟. لو ما تعرفيش تفاصيله وأهميته في مقالنا النهاردة هنعرف سوا كل حاجة عنه.

إيه هو الروتين الليلي للمدرسة؟

في الأول تعالي نسأل سؤال مهم وهو (إيه اللي بيحصل كل يوم وإنتِ بتجهزي أولادك للمدرسة؟).. اااه أنا شايفاكي وسمعاكي بتقولي إيه. طبعاً فوضى في كل شيء، صعوبة الصحيان، التجهيزات، كل حاجة في البيت بتجري ورا بعضها علشان تلحقوا تخلصوا المهمة المستحيلة. لكن لو الروتين الليلي للمدرسة موجود فكل شيء هيتغير.

هنا نقدر نقول إن الروتين الليلي للمدرسة عبارة عن روتين مهم للأولاد قبل النوم يتضمن تجهيز حاجات كثير وإنهاء أنشطة مختلفة. الروتين مهمته الأساسية إعداد الأطفال ليوم نشيط وفي نفس الوقت تخفيف الفوضى اللي بتحصل كل يوم الصبح.

أهمية الروتين الليلي

قبل ما نبدأ شرح خطوات الروتين المسائي لازم نعرف في الأول إيه هي أهميته.. ودي ممكن نلخصها في النقاط دي:-

• يعتبر من أهم الطرق المساعدة لتعليم الأولاد الاعتماد على النفس والاستقلالية.
• يساعد على تحسين أداء الأطفال الأكاديمي لإنه بيخليهم يبدأ اليوم في حالة من الاسترخاء والراحة والاستعداد لليوم الدراسي.

أهم خطوات الروتين الليلي للمدرسة 

دلوقتي تعالوا نعرف أهم الأجزاء اللي بيتكون منها الروتين المساء للأطفال، وإزي من خلاله يقدروا يجهزوا لنهار مليان بالنشاط:-

الواجب المنزلي

نبدأ في وضع قاعدة مهمة في البيت وهي ((ضرورة إنهاء الواجب قبل العشاء)). في الكثير من الأمهات بتسيب عملية أداء الواجب مفتوحة، وبالتالي نلاقي الأولاد مستمرين في الواجبات المدرسية لنص الليل، والحجة دائماً هي إن ما فيش وقت. لكن تغيير ده ضروري ومفروض. من المهم إن الأولاد تتعلم تخصيص وقت محدد للواجبات المنزلية بحيث ما تتعداش الوقت المخصص لوجبة العشاء.

وقت العشاء

تحديد وقت مخصص لوجبة العشاء. الخطوة دي مش بتساعد بس على تأسيس روتين للمدرسة صح، لكنها بتساعد الجسم على تحسين عملية الهضم والاستفادة من كل العناصر الغذائية المتاحة. غير كده تنظيم وقت الوجبة الأخيرة بيحسن من امتصاص البروتين وده معناه إن الأولاد حيبدأوا يومهم الجديد بنشاط وعقل مستعد لتقبل المعلومات بصورة أفضل.

مفيش تكنولوجيا في وقت تناول الطعام

ودي قاعدة أساسية من قواعد الروتين المسائي. وقت الطعام مخصص للطعام فقط. امنعي أي أجهزة إلكترونية أو شاشات. من المهم استغلال وقت العشاء للتواصل مع كل أفراد الأسرة. والوقت ده مناسب لكل فرد عشان يتكلم عن يومه ويشارك أنشطته مع العائلة.

تخصيص وقت للتسلية بعد العشاء

مش معنى إننا منعنا الشاشات والتليفونات وأجهزة التابلت على العشاء يبقى هنمنع التسلية بشكل كامل. لكننا حنخليها متاحة لفترة ممكن تكون نصف ساعة أو ساعة ومش أكثر من كده. في الوقت ده ممكن الأطفال يقوموا بألعاب الفيديو أو يستخدموا مواقع التواصل الاجتماعي.

روتين ما قبل النوم

وده بيضم غسل الأسنان والاستحمام والاسترخاء للقراءة أو سماع الموسيقى أو مشاهدة شيء خفيف ومسلي لمدة قليلة قبل النوم.

الروتين الليلي للمدرسة وخطة الإنقاذ في الصباح

بالإضافة للخطوات اللي اتكلمنا عنها في خطوات ثانية مهمة  وهي أساسية للحفاظ على الوقت والمجهود مع بداية النهار، الروتين ده يتضمن الآتي:-

تحضيرات الليلة السابقة

في حاجات كثيرة ممكن نبدأ في تجهيزها بالليل والأطفال يساعدونا فيها ومنها:-

• تحضير اللانش بوكس. ممكن ده يحصل من خلال تحضير مكوناته وتجهيز الأكلات القابلة للتسخين. وبكده مش هيكون في مهمة الصبح إلا تسخينها ووضعها في حقيبة المدرسة.
• فرز الزي الخاص بالمدرسة. ودي مهمة يقدر الأولاد يقوموا بيها، مثلاً تحضير الملابس المحتاجة للغسيل وتجهيز الملابس النظيفة وكيها بالإضافة لتحضير حذاء المدرسة وتنظيفه.
• تحضير حقيبة المدرسة وكل الأدوات الخاص باليوم التالي.
• تنظيم الغرفة والسرير وتخزين الكتب والأدوات في الأماكن المخصصة لها، الخطوة دي هتوفر الفوضى الكبيرة جداً اللي ممكن تحصل في النهار.

الخطوات اللي فاتت مش صعبة أبداً، لو عودتي الأولاد عليها لمدة أسبوع واحد فده يضمن إنهم يتعودوا عليها طوال العام الدراسي والإجازة كمان. كل المطلوب منك هو توضيح مهتهم وإعدادهم لتحمل المسؤولية عشان العام الدراسي يمر بهدوء وسلام.

للمزيد/ تنمية مهارات المذاكرة والتركيز والنشاط..نعملها ازاي؟