5 وجبات لذيذة للمدرسة ..سهلة ومش هتاخد وقت

اللانش بوكس وما أدراكم ما اللانش بوكس. ده تقريبا المعضلة التاريخية اللي كل الأمهات بتمر بيها من أول يوم في المدرسة. وأكثر حاجة محيرة فعلا هو التوفيق ما بين تحضير وجبات لذيذة في المدرسة وفي نفس الوقت تكون صحية واقتصادية. كذلك أهم شيء إنها تاخد وقت أقل في التحضير. عشان كده جهزنا ليكي النهاردة 8 وجبات لذيذة جداً ومريحة جداً.

وجبات لذيذة للمدرسة

مش عشان نحضر وجبات لذيذة للمدرسة يبقى محتاجين إننا ننسف ميزانية البيت. لكن ممكن بكل بساطة إننا نستخدم الأكل اليومي وناخذ منه جزء ينفع للانش بوكس المدرسة. كمان أهم حاجة إنك مع الوجبة الرئيسية تحضري خضروات وفواكه لأنها أكثر الحاجات الصحية واللي بتقوي المناعة في نفس الوقت. لذلك ياللا بينا دلوقتي نتعرف على أفضل 5 وجبات مدرسية ممكن تحضريها.

مافن البيض

ثانية واحدة ومن غير قلق، إنت إكيد بتقولي من أولها كده مافن وحاجات صعبة. لكن لأ خالص، مافن البيض نقدر نقول عليه النسخة الأجنبية من العجة بس بنداري إسمها وشكلها. أما طريقة تحضيره ومكوناته فهي سهلة جدا. المكونات كالاتي:-

• بيض ( على حسب عدد الأطفال وهتعملي كمية تكفي كام يوم)
• فلفل ملون.
• زيتون مخلي.
• زبدة.
• أوراق سبانخ.
• بهارات.
• صينية كب كيك.

طريقة التحضير

• في القلاية سخني الزبدة وحطي فيها كل الخضروات وقلبيها لحد ما تبدأ تذبل.
• جهزي صينية الكب كيك وحطي فيها الخضروات.
• اخلطي البيض مع البهارات واخفقيه كويس جداً بعد كده حطيه على الخضروات.
• اخبزي الصينية في الفرن لحد النضج التام.

سلطة المكرونة

المكرونة طعام نشوي مهم جداً للأطفال. وفي طرق مختلفة ممكن نخلي بيها وجبة المكرونة اقتصادية ولذيذة ومن غير ما نحتاج للحوم أو دجاج. لذلك ياللا بينا نتعرف على طريقة عمل سلطة المكرونة. لكن خلينا نعرف المكونات.

• ملعقة مايونيز.
• طبق مكرونة.
• مقدار بسيط لبن.
• بهارات.
• فلفل ملون مقطع شرائح.
• زيتون.
• ليمونة

طريقة التحضير

• جهزي طبق كبير وفيه حطي ملعقة المايونيز وملعقة لبن وليمون والبهارات وقلبي المكونات.
• ضعي المكرونة على الخلطة السابقة وبعد كده قومي بإضافة الفلفل والزيتون وقلبي كل المكونات.

مافن الموز

السناكس والحلويات من أفضل المكونات الخاصة باللانش بوكس. لكن أهم حاجة إنها هتجنب الأطفال خطر شراء الحلويات المحفوظة. عشان كده تعالي نعرف طريقة عمل مافن الموز أو فطيرة الموز.

المكونات

• 150 جم دقيق.
• بيكنج بودر.
• 2 ملعقة سكر.
• موزة مهروسة.
• بيض.
• لبن.
• زبدة.
• فانليا سائلة.

طريقة التحضير

• اخلطي المكونات الجافة لوحدها بعد كده اخلطي المكونات السائلة.
• قومي بإضافة كل المكونات وقلبي بشكل جيد بعد كده ضيفي الموزة المهروسة.
• صبي الخليط في صينية الكب كيك وادخليها للفرن.

رول الخضروات واللانشون

لو عايزين وجبة سهلة ومليانة بالروتين والفيتامينات فدي وصفة سهلة جدا. ممكن تستخدمي فيها شرائح اللانشون أو لانشون الفراخ أو أي لحوم بس تكون مقطعة في شكل شرائح رفيعة.

المقادير

• رغيف خبز بيض سوري أو عيش تورتيلا.
•  جبن شيدر.
•  خس أو جرجير أو سبانخ.
• شرائح أي نوع من اللحوم.
• طماطم.
• مايونيز.

طريقة التحضير

• افردي طبقة من المايونيز على العيش وغطيها بشرائح الخس أو أي خضار ورقي.
• ضعي طبقة من شرائح الجبنة.
• طبقة ثانية من شرائح اللحم.
• غطيه الطبقات السابقة بشرائح الطماطم. 
• لفي الرغيف على شكل رول.
• قطعي الرغيف لشرئح صغيرة.

بطاطس في الفرن

البطاطس من أفضل أنواع الطعام الصحي. لكن أهم شيء هو تجنب حصول الأطفال على كميات كبيرة من البطاطس المحمرة. لكن ممكن نقدمها بطريقة صحية جداً. أما المكونات فهي كالتالي:-

المقادير

• بطاطس مقطعة شرائح سميكة.
• ملعقة زيت زيتون.
• باربريكا وبهارات.

طريقة التحضير

اخلطي المكونات كلها بعد كده دخليها الفرن لحد ما تتأكدي إن البطاطس استوت تماماً. بعد كده حطيها في اللانش بوكس الخاص بطفلك.

للمزيد: ازاي تحافظي على محتويات اللانش بوكس طول اليوم.