ايه هو أفضل وقت للتمارين الرياضية في رمضان؟

الاحتفاظ باللياقة والوزن الصحي خلال شهر رمضان المبارك تحدي كبير كلنا بنقابله. لأن بعد يوم طويل من الصيام بنحتاج نحصل على سعرات حرارية عالية تعوضنا عن فترة الصيام. كذلك الصيام مع الحر بيخلينا نشرب عصائر كثيرة.

لكن ممكن نتحكم ونقلل زيادة الوزن اللي ممكن تحصل من خلال ممارسة الرياضة. لكن إيه هو أفضل وقت للتمارين الرياضية؟ ده هنعرفه في مقالنا النهاردة.

أفضل وقت للتمارين الرياضية في رمضان

معظم خبراء الرياضة والصحة اتفقوا على إن أفضل وقت للتمارين الرياضية في رمضان ممكن يكون في الفترات دي:-

• أولاً، قبل الفطار بساعة أو ساعة ونص. لأن الوقت ده الجسم هيكون قدامه فترة قصيرة جداً ويحصل على العناصر الغذائية.
• ثانياً، بعد الفطار بساعتين أو ثلاث ساعات.

أهمية ممارسة الرياضة قبل الفطار

وبالرغم من إمكانية ممارسة الرياضة بعد الفطار، إلا إن الخبراء بيؤكدوا إن ممارسة الرياضة قبل الإفطار بساعتين هو الوقت اللي الجسم بيتسفيد فيه أكثر. كذلك في حاجات كثيرة تخلينا نركز مجهودنا في الوقت ده ومنها:-

• الوقت ده بيحفز الجسم بطريقة أكثر علشان يتخلص من السموم الموجودة في الجسم بعد هضم الطعام.
• قبل الفطار مستوى سكر الدم بيبدأ ينخفض جداً. لذلك الجسم بيبدأ يحرق السعرات الحرارية المتخزنة فيه. وبكده تكون دي أكثر فترة ممكن نخسر فيها الوزن الزائد.
• بتزود شعور الراحة وبتقلل مجهود الجسم لأن الوقت بين ممارسة التمارين وتناول الطعام بيكون قليل جداً.

ايه هي أفضل مدة للتمرين؟

في أول يوم رمضان أهم حاجة إن مدة التمرين ما تكونش طويلة لأن ده بيؤدي للإجهاد وممكن يكون له مضاعفات. لذلك من المهم اننا نبدأ زيادة وقت التمرين بشكل تدريجي عشان الجسم يبدأ يزود درجة تحمله. مثلاً في أول أيام رمضان لا ينصح بزيادة معدل التمرين عن 30 دقيقة. وبعد كده يتم زيادة المعدل ده بالتدريج.

أسوأ وقت ممارسة الأنشطة الرياضية

وزي ما في وقت مفضل للتمارين الرياضية، كمان في وقت من المهم إننا نبعد تماماً عن ممارسة الأنشطة البدنية خلاله. لأن ممكن نتعرض لمضاعفات. الوقت ده هو منتصف النهار أو فترة بعد الظهر. لأن الجسم هيبدأ يستنفذ كل طاقته للتمرين، وبالتالي الشعور والتعب والإرهاق هيفضلوا موجودين لحد الفطار.

التمارين بعد الإفطار

ممارسة الأنشطة والتمارين بعد الإفطار برضه من الأوقات المسموح بيها. لكن في نفس الوقت لازم ما تكونش بعد الفطار مباشرة، ومن المهم إننا ننتظر ساعتين أو ثلاثة. ومميزات الرياضة في الوقت ده متعددة ومنها:-

• بتساعد على حرق السعرات الحرارية، لأنها بتوجه نشاط الجسم لبناء العضلات، وبالتالي بتساعد على تقليل الوزن.
• تعتبر الفترة المناسبة أكثر لكبار السن لأن بيكون عندهم طاقة لاستخدامها في الرياضة.
• تحفيز عملية التمثيل الغذائي.

نصائح مهمة للممارسة الرياضة في رمضان

• من المهم عدم زيادة مدة التمارين أو استخدام تمارين قاسية.
• تناول الوجبات اللي بتحتوي على الألياف والفيتامينات.
• الحصول على نسبة كبيرة من المياه في الفترة بين الإفطار والسحور للحفاظ على رطوبة الجسم.
• اختيار اللعب في وقت قليل الحرارة وبعيد عن الشمس.
• ممارسة الرياضات المعتدلة زي المشي والسويدي والجري وركوب الدراجات.

للمزيد: مرضى ضغط الدم في رمضان..مخاطر الصيام وأهم الإرشادات.